Demokratik İslahatlar Partiyasının
Siyasi Şurası 2018-ci il aprelin 11-nə təyin olunmuş Azərbaycan Respublikası
Prezidenti seçkiləri və partiyanın seçkidə iştirak forması ilə bağlı məsələləri
müzakirə edərək müvafiq qərar qəbul edib. Qərarda qeyd olunur ki,
Azərbaycan Respublikası Konstitusiyasının 101-ci maddəsinin I hissəsinə əsasən
Azərbaycan Respublikasının Prezidenti növbədənkənar prezident seçkilərini elan
edə bilər. Odur ki, Prezident İlham Əliyevin növbədənkənar prezident
seçkilərinin keçirilməsi barədə 5 fevral 2018-ci il tarixli sərəncamı tamamilə
qanunauyğundur və Demokratik İslahatlar Partiyası da bunu nəzərə alaraq
seçkilərdə iştirak edəcək. Siyasi Şurasının seçkilərdə
iştirak forması ilə bağlı qəbul etdiyi qərara əsasən partiya seçkilərdə öz
namizədi ilə iştirak etməyəcək. Ümumilikdə isə seçki prosesini ciddi şəkildə
müşahidə edəcək və müşahidələrin nəticələrini seçkidən sonra ictimaiyyətə
açıqlayacaq. Partiya üzvləri isə seçkilərdə iştirak etməkdə və istədikləri
namizədi dəstəkləməkdə sərbəstdirlər.
Xatırladaq ki, partiyanın V qurultayında (30
yanvar 2016-cı il) seçkilərdə iştirakla bağlı qərar qəbul edilmiş, iştirak
formasını müəyyənləşdirmək səlahiyyəti Siyasi Şuraya həvalə olunmuşdu.
|