“Azərbaycan
ailələrində uşaqlara qayğı, diqqət çox mühümdür. Uşaqlara qarşı zorakılıq,
cinsi istismar yolverilməzdir”.
Demokratik
İslahatlar Partiyasının sədri, millət vəkili Asim Mollazadə bu fikirləri Milli
Məclisin bugünkü plenar iclasında “Uşaqların cinsi istismardan və cinsi zorakılıqdan
müdafiəsi haqqında” Avropa Şurası Konvensiyasının təsdiq edilməsi barədə AR
qanun layihəsinin müzakirəsi zamanı deyib. Millət
vəkilimizin Avropa Şurasında bu məsələlərlə bağlı məruzəçi olduğunu vurğulayan
Asim Mollazadə qeyd edib ki, Azərbaycan bu məsələ ilə bağlı hər zaman səsini
ucaltmağa hazırdır. O, sənədə Azərbaycan ərazilərinin işğal olunduğu faktının
əlavə edilməsini təqdir edib: “Ümidvaram ki, işğal olunmuş ərazilərimizlə bağlı
məsələləri Avropa Şurasının timsalında növbəti dəfə beynəlxalq təşkilatın
diqqətinə çatdırmış olacağıq”. Asim
Mollazadə öz növbəsində İstanbul konvensiyasının (“Qadınlara qarşı zorakılıq və
məişət zorakılığının qarşısının alınması və ona qarşı mübarizə haqqında Avropa
Şurası Konvensiyası”, İstanbul, 11.V.2011) təsdiq edilməsi təklifini irəli
sürüb. “Azərbaycan
İslam və Türk dünyasında ilk dəfə, hətta ABŞ və bir sıra Avropa ölkələrindən
qabaq qadınlara seçib-seçilmək hüququ verib. Qadın liderliyi hər zaman
Azərbaycanda diqqət mərkəzində olub. Çox təəssüf ki, biz qadınlara qarşı
zorakılıqla bağlı müvafiq sənədlərin qəbulunu ləngidirik. Bizdə Ailə, Qadın və
Uşaq Problemləri üzrə Dövlət Komitəsi var, parlamentdə də müvafiq komitə
fəaliyyət göstərir. Mənə elə gəlir ki, Azərbaycan İstanbul konvensiyasını ləngimədən
dəstəkləməlidir”, – deyə millət vəkili bildirib.
“Azərbaycanda
qadın zorakılığına qarşı mübarizə daha da sərtləşdirilməlidir. Artıq bir sıra
bölgələrimizdə erkən nikahlarla, qızların təhsili ilə bağlı problemlər yaranıb,
qız uşaqlarını məktəbə buraxmırlar. Bu, Azərbaycan dövlətinin və xalqının
milli-mənəvi dəyərlərinə ziddir. Odur ki, Azərbaycan parlamenti yaxın müddətdə
İstanbul konvensiyasını təsdiqləməlidir”, - Asim Mollazadə əlavə edib.
|