Demokratik İslahatlar Partiyası 22 iyul – Milli Mətbuat Günü
münasibətilə "Həsən bəy Zərdabi və Nəcəf Nəcəfov ənənələrinin davamı və
inkişafı uğrunda" mükafatı sahibinə təqdim edib. Qeyd edək ki, bu mükafata 2019-cu ildə Sputnik Azərbaycan BİA-nın
əməkdaşı Zülfiyyə Quluyevaya layiq görülüb. Partiya Zülfiyə Quluyevanı ölkənin
sosial-iqtisadi həyatı ilə bağlı yazdığı obyektiv məqalələrə görə bu mükafatla
təltif edib. Demokratik İslahatlar Partiyasının sədri Asim Mollazadə mükafatı
təqdim edərkən qeyd edib ki, Azərbaycanda 1875-ci ildə ilk dəfə işıq üzü görən “Əkinçi” qəzetindən başlanan yol ölkə KİV-ləri tərəfindən
ləyaqətlə davam etdirilir. “Azərbaycan dövlət müstəqilliyini bərpa etdikdən
sonra ölkədə media azadlıqları və jurnalistikanın inkişafı istiqamətində xeyli
yol qət edilib. Ölkədə beynəlxalq səviyyəli xeyli bacarıqlı jurnalist yetişib
və bu, çox sevindirici haldır. Bu mükafat daha çox rəmzi xarakter daşısa da,
biz bununla cəmiyyətin diqqətini söz və mətbuat azadlığına yönəltmək istəyirik.
Əminəm ki, yaxın gələcəkdə milli jurnalistikamızın daha çox uğurlarının şahidi
olacağıq”, – deyə Mollazadə bildirib. Sonra o, müvafiq diplomu və mükafatı
sahibinə təqdim edib. Zülfiyyə Quluyeva isə öz növbəsində deyib ki,
Azərbaycan jurnalistikasının iki ən önəmli simasının adını daşıyan mükafatı
almaq onun üçün böyük şərəfdir. O, bu yüksək etimada görə, Demokratik
İslahatlar Partiyasına təşəkkür edib.
Qeyd edək ki, bu təsisatda məqsəd jurnalistləri əsası 1875-ci ildə
Həsən bəy Zərdabi tərəfindən qoyulmuş, 20-ci əsrin 90-cı illərində Nəcəf
Nəcəfov tərəfindən yenidən canlandırılmış Azərbaycan mətbuatının maarifçilik
ənənələrini davam etdirməyə, azad, demokratik və peşəkar mətbuatın formalaşması
uğrunda yorulmadan mübarizə aparmağa, obyektiv və məsuliyyətli sözə üstünlük
verməyə həvəsləndirməkdir. Mükafat DİP
tərəfindən 2008-ci ildə təsis olunub.
|