Avropa Şurası Parlament Assambleyasının (AŞ PA) yaz sessiyasında ermənilər növbəti dəfə uğursuzluğa düçar oldular. Belə ki, erməni terrorçu-diversantlarla bağlı məsələ müzakirəyə çıxarılsa da, sonda erməni deputatlar və ermənipərəst parlamentarilər hədəflərinə çata, qurumun qətnamə qəbul etməsinə nail ola bilmədilər.

Amma bununla belə, AŞ PA Monitorinq Komitəsi Bakıya terrorçu-diversantların Ermənistana qaytarılması barədə çağırış edib. Ekspertlərin əksəriyyəti belə çağırışların əhəmiyyətsiz olduğunu düşünürlər.

Azərbaycanın AŞPA-dakı nümayəndə heyətinin üzvü, Demokratik İslahatlar Partiyasının sədri Asim Mollazadə “Yeni Müsavat”a bunları dedi: “Bu cür sənədlərin, çağırışların heç bir hüquqi əsası yoxdur. Biz bunu dəfələrlə müşahidə etmişik ki, Ermənistanı dəstəkləyən siyasətçilər erməni diasporu ilə sıx əlaqədə olan şəxslərdir. Onların çoxu Dağlıq Qarabağ işğal altında olan zamanlar ora səfər edənlərdir. Erməni diasporuna bağlı olduqları üçün öz ölkələrinin parlamentində bu cür sənədlər qəbul etdirməyə çalışıblar. Avropa Şurasında da çox fəal şəkildə Ermənistanı dəstəkləyirlər. Burada başqa bir məqam da var ki, beynəlxalq hüquq normaları tam olaraq Azərbaycanın tərəfində olduğu üçün Ermənistanı dəstəkləyənlər heç bir şey edə bilmirlər. Azərbaycan BMT-nin qətnamələrini icra etdi. Minsk qrupunun həll etmədiyi problemi rəsmi Bakı həll edib. 10 noyabrdakı anlaşmadan sonra həmin terrorçular Azərbaycan tərəfində qalıblar, ərazilərimizi tərk etməyiblər, nəticədə ələ keçiblər. Faktiki təhlükə mənbəyi olduqları üçün əməliyyat həyata keçirilib və onlar zərərsizləşdirilib. Razılaşmanın bəndlərinin tam icrası üçün Ermənistana təzyiq edilməlidir ki, insanlar sülh, əmin-amanlıq şəraitində yaşasınlar”.

Deputat Azərbaycan nümayəndə heyətinin AŞ PA-nın yaz sessiyasındakı çıxışına da toxundu: “Nümayəndə heyətimiz çox yüksək səviyyədə çıxış etdi. Yerində müdaxilələr olundu. Həqiqətlər bir daha açıqlandı. Ermənilər beynəlxalq təşkilatlara uyğun olmayan dildə danışırdılar. Görünür onlar özlərini İrəvanın küçələrində zənn edirdilər. Bu sessiyada Türkiyəyə qarşı da təzyiqlər var idi. Bununla bağlı çıxış etdim. Bu hücumların arxasında siyasi mahiyyət daşıyan məqamların olduğunu açıqladım. Demokratiya, insan haqlarından alət kimi bəzi ölkələrin istifadə etdiyinin də şahidi olduq. Bunların hamısı çox təəssüf doğuran məsələlərdir. Bu gün biz istəyirik ki, beynəlxalq hüquq normalarına, hüququn aliliyinə hörmət edilsin. Zəngin icmaların təsiri altında olan bəzi ölkələrin bu cür davranışları heç kimə başucalığı gətirməz, təbii olaraq, bu ölkələrin təmsilçilərinə də. Azərbaycan elə ölkə deyil ki, kimsə bizimlə aşağılayıcı tonda danışsın, kiminsə sifarişlərini yerinə yetirək”.

A.Mollazadə bu cür münasibətin Azərbaycan-AŞ PA əlaqələrinə təsir etməyəcəyini düşünür: “Mənə elə gəlir ki, heç bir təsiri olmayacaq. Biz öz dəyərlərimizi daim qoruyuruq. Hüquqlarımızı daim müdafiə etməyə hazırıq. Bunu hər zaman dilə gətiririk. Yalan iftiraların qarşısını almaq üçün daim fəaliyyətdə olmalıyıq. Mövqeyimiz tərəfdaşlığa, əməkdaşlığa və sülhə yönəldiyinə görə bunda maraqlı olanlar Azərbaycanla münasibətlərini daim normal saxlayırlar”.

“Erməni tərəfinin başlatdığı debatlar ümidsizlik və çarəsizlikdən başqa bir şey deyil. Onların bu addımı diqqəti Azərbaycanın qələbə faktından yayındırmaq məqsədi daşıyırdı. Erməni tərəfinin yenidən müharibə dövrünə, keçmişə qayıtmaq cəhdi reallığı dərk etməmələrindən irəli gəlir və bütün təşəbbüslərinin arxasında bu dayanır. Faktları saxtalaşdıraraq, guya Azərbaycan tərəfinin qanunsuz saxladığı erməni hərbi cinayətkarları, təxribatçıları və terrorçuları əsir kimi təqdim edərək, qurban obrazında göstərməyə çalışdılar. Bu bir çıxışda əks olunan saxta, yalan və ikiüzlülüyün ifadəsi idi”.....

Cavanşir ABBASLI,

“Yeni Müsavat”