Demokratik
İslahatlar Partiyasının sədri, millət vəkili Asim Mollazadə Milli Məclisin
bugün keçirilən növbədənkənar iclasında ölkənin enerji sisteminin yeni
strategiyaya və zamanın tələbinə uyğun qurulması istiqamətində təkliflərlə
çıxış edib.
"Enerji
resurslarından səmərəli istifadə və enerji effektivliyi haqqında" qanun
layihəsinin (birinci oxunuş) müzakirəsi
zamanı o deyib ki, “Yaşıl Azərbaycan” və alternativ enerjidən istifadə ilə
bağlı digər layihələr həyata keçirilərkən ətraf mühitə daha çox diqqət yetirmək
lazımdır. “Bu
qanunda enerji sahələrinin istifadəsi ilə bağlı çox mühüm məqamlar öz əksini
tapıb. Söhbət müvafiq auditin həyata keçirilməsindən gedir. Düzdür, bu amil
daha çox istehlakçılara aiddir. Amma enerji istehsalçılarına da çox ciddi
diqqət yetirmək lazımdır. Bu istiqamətdə mütəmadi audutun həyata keçirilməsinə
böyük ehtiyac var”, - deyən Asim Mollazadə ölkədə ciddi enerji itkisinin baş
vermə səbəblərinə də toxunub. O
qeyd edib ki, enerji sahəsində itkilər ilk növbədə köhnə texnologiya və ölkədə
enerjinin nəqli ilə bağlı olan köhnə infrastrukturla bağlıdır. Odur ki, ölkədə
bu istiqamətdə çox ciddi islahatları həyata keçirməyə ehtiyac var. Bu prosesin
avanqardı isə “Qarabağa böyük qayıdış” layihəsi ola bilər. Bu layihə
çərçivəsində müasir ağıllı texnologiyalardan istifadə olunacaq. Alternativ
üsullarla əldə olunan enerjinin itkilərini də bu texnologiyalarla azalda
bilərik. Asim
Mollazadə öz çıxışında avtomobil nəqliyyatı ilə bağlı problemlərə də toxunub.
Qeyd edib ki, ilk növbədə böyük şəhərlərdə ictimai nəqliyyat kimi elektrik
motorları ilə işləyən (elektromobil) avtobuslara keçmək lazımdır. Artıq
Azərbaycanda elektromobillərin istehsalına başlandığını vurğulayan deputatın
fikrincə, böyük şəhərlərdə elektromobil olmayan ictimai nəqliyyatın işləməsinə
qadağa qoyulmalıdır. Ölkəyə idxal olunan elektromobillərə isə müvafiq güzəştlər
tətbiq edilməlidir. Əgər ətraf mühitin təmizlənməsini istəyiriksə, mütləq bu
addımları atmalıyıq. Asim
Mollazadə yeni texnologiyaların həm konvensional,
həm də alternativ bərpaolunan mənbələrdən alının enerjiyə tətbiq edilməsinin
zəruriliyini qeyd edib. “Elektrik enerjisinin toplanması üçün müvafiq batareyaların əldə
olunmasına çalışmaq lazımdır. Bu, artıq bir çox ölkələrdə həyata keçirilir.
Məsələn, Ukraynada az enerji tələb olunan dövrlərdə enerji elektrik
stansiyalarındakı batareyalarda toplanır. Enerjiyə tələbat artanda isə məhz
həmin batareyalarda toplanmış enerjidən istifadə edilir. Əgər Ukrayna bundan
istifadəyə başlayıbsa, Azərbaycan da müasir batareyaların tətbiqinə
başlamalıdır ki, müvafiq dövrlərdə enerjini toplamaq və lazım olan məqamda
ondan istifadə etmək mümkün olsun”, - deyə Asim Mollazadə fikrini tamamlayıb.
|