Məhərrəmova/AZADİNFORM. Ermənistan öz təcavüzkar siyasətinə son qoymayıb. Beynəlxalq təşkilatlar sülh istiqamətində addım atmaq istəyirsə, Ermənistan belə təxribatlarla sülh prosesini pozmağa çalışır. Bu fikri Azadinform-a deputat Asim Mollazadə Ermənistanın işğal edilmiş Azərbaycan ərazilərində hərbi təlimlər keçirməsinə münasibət bildirərkən deyib. Deputat vurğulayıb ki, Ermənistanın əsas məqsədi Dağlıq Qarabağda bugünkü status-kvonu saxlamaq və sülhə nail olmamaqdır: “Ermənistan sülh istəmir. Bu ölkənin rəhbərliyi siyasi karyerasını müharibə, insanların qanı üzərində qurub”. A.Mollazadə bildirib ki, Ermənistan belə təxribatlarla beynəlxalq ictimaiyyətə meydan oxuyur. Rusiyanın Ermənistan ordusunu İsgəndər kompleksi ilə silahlandırmasına gəlincə, deputat qeyd edib ki, Ermənistan müstəqil dövlət deyil: “O öz müstəqilliyini çoxdan itirib və hərbi bazaya çevrilib. Bu gün əhali də ölkəni tərk edir və Rusiyanın hərbi bazasını istənilən silahlarla təmin etməsi normal prosesdir. Bu birinci dəfə baş vermir. Ermənistana milyardlarla silah verirlər. Burada əsas məqsəd Emənistanı hərbi baza kimi saxlamaqdır”.
|