Demokratik İslahatlar Partiyası martın 10-da Avropa Parlamentinin
qəbul etdiyi “Qarabağda erməni mədəni irsinin məhv edilməsi”nə dair qətnaməni
pisləyən bəyanat yayıb.
Bəyanatda
deyilir: “Martın 10-da Avropa Parlamenti
tərəfindən qəbul olunan Qarabağda erməni mədəni irsinin məhv edilməsi ilə bağlı
qətnamə Azərbaycana qarşı qərəzli münasibətin, ikili standartın bariz
nümunəsidir. Avropa dövlətləri Ermənistan-Azərbaycan Dağlıq Qarabağ
münaqişəsinin həlli istiqamətində uzun illər davam edən diplomatik prosesdə
ölkəmizə qarşı riyakar mövqe nümayiş etdiriblər. İstər 2020-ci ilin
sentyabrında başlamış 44 günlük Vətən müharibəsi zamanı, istərsə də Azərbaycanın
zəfər qazanmasından sonra ona qarşı ayrı-seçkilik özünü qabarıq şəkildə biruzə
verir. Avropa qurumları son 30 ildə Azərbaycan ərazilərinin 20%-ni işğal
altında saxlayan, 1 milyonadək vətəndaşının məcburi köçkün vəziyyətinə
düşməsinə səbəb olan, Xocalı soyqırımı başda olmaqla azərbaycanlılara qarşı
çoxsaylı qətliamlar törədən, işğal etdikləri ərazilərdə Azərbaycan irsini
barbarcasına məhv edən, daşı-daş üstə qoymayan, azərbaycanlıların bütün daşınar
və daşınmaz əmlaklarını talan edən, məscidlərimizdə donuz saxlayan, alban
irsimizin yadigarı olan kilsələri (o cümlədən rus pravoslav kilsəsini) məhv
edən, saxtalaşdıran Ermənistanın nasist siyasətini görməzdən gəlib. Azərbaycan
hökuməti 44 günlük müharibədən sonra dəfələrlə beynəlxalq ictimaiyyətin, diplomatik
korpusun (Avropa ölkələrinin səfirləri və səfirliklərin əməkdaşları da daxil
olmaqla) nümayəndələrinin, xarici jurnalistlərin işğaldan azad olunmuş
ərazilərə səfərlərini təşkil edib. Onlar erməni vandallığına məruz qalmış,
yerlə-yeksan edilmiş Azərbaycan kənd və şəhərlərini öz gözləri ilə görərək
dəhşətə gəliblər. Bundan başqa, Azərbaycan dəfələrlə
UNESKO-ya Qarabağa xüsusi missiya göndərməsi üçün müraciət edib. Azərbaycan
irsinin ermənilər tərəfindən məhv edildiyi UNESKO-nun məruzələrində də təsdiqini
tapıb. Azərbaycan dəfələrlə Qarabağda ayrı-ayrı tarixi-mədəni irsimizə qarşı
törədilən vandallıqlar haqqında faktları, sübutları dünya ictimaiyyətinə,
Avropa Parlamentinə və digər qurumlara təqdim etsə də, bunlara heç bir reaksiya
verilməyib. Halbuki bu, Ermənistan tərəfindən beynəlxalq humanitar hüququn, o
cümlədən 1954-cü il Haaqa Konvensiyasının və onun Protokollarının kobud şəkildə
pozulmasıdır. Odur ki, Avropa Parlamentinin
Azərbaycanın guya erməni abidələrini dağıtması ilə bağlı qətnamə qəbul etməsi
bu qurumun, onun parlamentarilərinin həqiqətləri görməzdən gəlməsi, erməni
lobbisinin saxta təbliğatına alət olmasının nəticəsidir. Biz erməni lobbiçiliyi və diasporunun
siyasi korrupsiya üsullarından istifadə edərək anti-azərbaycan, anti-türk
fəaliyyətlərinin dəfələrlə şahidi olmuşuq. İndi isə Azərbaycan irsini məhv
etmiş ermənilər faktları təhrif edərək, guya Azərbaycanın erməni irsini məhv
etdiyi barədə saxta məlumatlar uydurub və qoca qitənin seçilmiş deputatlarını
da bu yalana alət ediblər. Bu qətnamə Azərbaycanda AP-nin
fəaliyyətinə çox mənfi münasibət formalaşdırmaqdadır. Ölkə əhalisi
avropalıların bəyan etdikləri dəyərlərlə həyata keçirdikləri siyasət arasında dərin
uçurumun və ziddiyyətin olduğunu görürlər. Ona görə də ölkəmizdə bu quruma,
onun dəyərlərinə inam getdikcə sarsılmaqdadır. Ümumiyyətlə, AP, eləcə də Avropanın digər qurumları
dəfələrlə Azərbaycana qarşı haqsız qərarlar qəbul etməklə, ikili standartlarla
yanaşmaqla xalqımızın nəzərində öz etimadlarını itiriblər. Ermənilərin
Azərbaycan ərazilərini işğal edərkən məhv etdikləri tarixi abidələrin guya
Azərbaycan tərəfindən dağıdıldığını qanuniləşdirmək cəhdləri beynəlxalq
səviyyədə saxtakarlıqdır. Bu, nəinki beynəlxalq humanitar hüququn
prinsiplərinə, həm də mədəni və dini abidələrin dağıdılmasına qarşı Avropa
İttifaqının özünün qəbul etdiyi prinsiplərə ziddir. Azərbaycan bu gün Ukraynada baş verən hadisələrdə
ədalətli mövqeyini qorumağa çalışır. Avropadan daha əvvəl Ukraynaya öz
humanitar dəstəyini göstərməyə başlayıb. Eyni zamanda, Azərbaycanın Avropanı
mavi yanacaqla, enerji daşıyıcıları ilə təmin edəcək alternativ enerji ölkəsi
və tranzit olması da danılmaz faktdır. Belə bir məqamda AP-nin ölkəmizə qarşı
bu adekvat olmayan hərəkəti anlaşılan deyil. Onlar öz ölkələrinin maraqlarını
müdafiə etməkdənsə, erməni lobbilərinin maraqlarını təmin etməyə çalışırlar. Biz AP-nin sözügedən qətnaməsini
qətiyyətlə pisləyir, onu ədalətsiz, həqiqətdənkənar, erməni lobbilərinin
maraqlarını təmin edən, hüquqazidd, əsassız sənəd kimi qiymətləndiririk.
Avropadakı tərəfdaşlarımızı dünyada hüquqi nihilizmin baş alıb getdiyi bir
zamanda hüququn aliliyinin və gözlə görünən həqiqətlərin yanında yer almağa
çağırırıq”.
|