Demokratik İslahatlar Partiyası 31 Mart - Azərbaycanlıların Soyqırımı
Günü ilə əlaqədar bəyanat yayıb. Bəyanatda deyilir:
"1918-ci ilin martında Bakı şəhərində,
Bakı quberniyasının müxtəlif bölgələrində, eləcə də Şamaxı, Quba, Xaçmaz,
Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə
Bakı Soveti və Daşnaksütundan olan erməni silahlı dəstələri tərəfindən
azərbaycanlılara qarşı soyqırımı törədilib. Bu, “dənizdən dənizə Böyük
Ermənistan" qurmaq xəyalı ilə yaşayan erməni millətçilərinin, eləcə də
onların havadarlarının Azərbaycan xalqına qarşı törətdiyi soyqırımı, etnik
təmizləmə və deportasiya siyasətinin tərkib hissəsi idi. Dəhşətli qırğınlar
zamanı on minlərlə azərbaycanlı qətlə yetirilmiş, itkin düşmüş, şikəst
edilmişdi. Daşnaklar insanları etnik və dini
mənsubiyyətinə görə qətlə yetirməklə yanaşı, yaşayış məntəqələrini, mədəniyyət
abidələrini, məscidləri və digər ibadət yerləri, qəbiristanlıqları barbarcasına
dağıtmış, yandırmış və dinc əhaliyə divan tutmuşdular.1918-ci ildən geri qalan
toplu məzarlıqlar, viran edilmiş kənd və şəhərlər, məhv edilmiş tarixi və
mədəni irsimiz olub. XX əsrin əvvəllərində törətdikləri qanlı
cinayətlərə görə layiqli cəzalarını almayan erməni millətçiləri 74 il sonra (1992-ci
ildə) azərbaycanlılara qarşı növbəti irimiqyaslı soyqırımı Xocalı şəhərinin
dinc sakinlərinə qarşı törətdilər. Bu qətliamlara dair kifayət
qədər əsaslı sübut və dəlillər olsa da, dünya ictimaiyyəti hələ də buna adekvat
qiymət verməyib. Axı qətliamlar təkcə azərbaycanlılara qarşı deyil, bu
coğrafiyada yaşayan dağ yəhudiləri, ləzgilər, tatlar, talışlar, eləcə də digər
azsaylı xalqların nümayəndələrinə qarşı da törədilmişdi. Ancaq görünür, dünyanı
Azərbaycanda yaşayan xalqların zaman-zaman ermənilər tərəfindən genosidə
uğradılması deyil, erməni lobbilərinin qondarma “erməni soyqırımı” nağılları
daha çox maraqlandırır. Azərbaycan xalqı və dövləti
həmişə qətliamlara, siyasi və hərbi münaqişələrə ikili standartlarla
yanaşılmadan əziyyət çəkib. Bundan ruhlanan ermənilər regionda üçüncü
qüvvələrin dəstəyi ilə azərbaycanlılara qarşı cinayətlərini davam etdirirlər. XX
əsrin 90-cı illərində işğal etdikləri Azərbaycan ərazilərindəki bütün kənd və
şəhərləri yerlə-yeksan ediblər, talanlar və kütləvi qırğınlar törədiblər. Biz son illər ərzində
Azərbaycanın bütün çağırışlarına baxmayaraq, əlaqədar beynəlxalq təşkilatların
məsələlərin yerində araşdırılması üçün regiona hər hansı faktaraşdırıcı missiya
göndərməməsini, ermənilərin azərbaycanlılara qarşı törətdiyi görünməmiş hərbi
və mülki cinayətlərə hüquqi qiymət verməməsini böyük ədalətsizlik, ayrı-seçkilik,
beynəlxalq humanitar hüquq prinsiplərinin pozulması kimi qiymətləndiririk.
Beynəlxalq təşkilatları və dövlətləri
monoetnik Ermənistandan fərqli olaraq, tolerantlıq prinsiplərinə və
multikulturalizm dəyərlərinə sahib multietnik Azərbaycan dövlətinin, xalqının
tarixi bəlalarına biganə qalmamağa, gələcəkdə bu kimi halların təkrarlanmaması
naminə ermənilərin tarix boyu azərbaycanlılara qarşı törətdiyi qətliamlara
hüquqi qiymət verməyə çağırırıq!
|