"Həsən
bəy Zərdabi və Nəcəf Nəcəfov ənənələrinin davamı və inkişafı uğrunda" mükafata
2022-ci ildə layiq görülən jurnalistlərin adları açıqlandı.
Demokratik İslahatlar
Partiyasının Siyasi Şurası 22 iyul – Milli Mətbuat Günü münasibətilə
"Həsən bəy Zərdabi və Nəcəf Nəcəfov ənənələrinin davamı və inkişafı
uğrunda" mükafata 2022-ci ildə layiq görülən şəxslərlə bağlı qərarını
açıqlayıb. Qərara
əsasən, sözügedən mükafat və müvafiq diplom daxili və xarici siyasətlə bağlı məqalələrinə görə Nemət Orucov (Telegraf.com-un
əməkdaşı) və ölkənin ictimai-siyasi
həyatı ilə bağlı məqalələrinə görə Aysel Aslana (modern.az) təqdim
ediləcək. Xatırladaq
ki, bu təsisatda məqsəd əsası 1875-ci
ildə Həsən bəy Zərdabi tərəfindən qoyulmuş, 20-ci əsrin 90-cı illərində Nəcəf
Nəcəfov tərəfindən yenidən canlandırılmış Azərbaycan mətbuatının maarifçilik
ənənələrini davam etdirməyə, azad, demokratik və peşəkar mətbuatın formalaşması
uğrunda yorulmadan mübarizə aparmağa, obyektiv və məsuliyyətli sözə üstünlük
verməyə həvəsləndirməkdir. Mükafat DİP tərəfindən 2008-ci ildə təsis olunub. Demokratik
İslahatlar Partiyasının sədri Asim Mollazadə sözügedən mükafata layiq görülən
jurnalistləri və Azərbaycan KİV-nin bütün nümayəndələrini milli mətbuatımızın
yaradılmasının 147 illiyi münasibətilə təbrik edir.
|